Greinasafn | mars 2012

Draumar um framtíð kirkjunnar

Í dag opnar vefsíða, þar sem ég mun skrifa um hugðarefni, sem tengjast þjóðkirkjunni og starfi hennar. Hér langar mig að deila með ykkur draumum um framtíð kirkjunnar.

Nú eru mikil tímamót í kirkjunni þar sem innan örfárra daga mun verða ljóst hver mun verða biskup landsins næstu árin.  Ég ber mikla væntingar til þeirra tveggja frambjóðenda sem efst urðu í fyrri umferð biskupskosninganna.  Ég þekki þau bæði mjög vel allt frá námsárum mínum í guðfræðideild Háskóla Íslands.

Ég er mjög stolt af kirkjunni minni fyrir að hafa rýmkað kosningarétt í biskupskosningum og þar með aukið lýðræðið í stofnun sem í eðli sínu á að vera lýðræðisleg.  Ég er líka mjög stolt yfir því að þau sem hafa kosningarrétt notuðu hann í kosningunum, en yfir 90% nýttu sér atkvæðisréttinn.

Nú er síðari umferð kosninganna að fara í gang. Báðir frambjóðendurnir eru víðsýnir og hafa mikla reynslu af því að starfa með fólki.  Bæði hafa lagt mikla áherslu á barna- og unglingastarf, sem er grunnurinn að öllu kirkjulegu starfi og bæði leggja mikla áherslu á jafnrétti kynjanna.

Framtíð kirkjunnar er því björt á þessum vordögum.

Þessi færsla var birt þann 30/03/2012. 3 Ummæli